Arabs got talent

انهاردة أقترح علي بعض الزملاء أني أشوف فيديو لواحدة بتقلد سعاد حسني في برنامج#arabsgottalent

شوفت الفيديو وانا poker face و لما الفيديو خلص ماكنتش لاقية تعليق مناسب...

لما فكرت كده دلوقتي ... تعليقي هيكون للبرنامج نفسه..

ايه القرف ده؟؟!!!!

بجد إيه القرف ده؟؟؟

يعني إحنا ناس فاضية وعندنا ما يكفي من الفلوس إللي مالهاش أي ثلاثين لازمة  لإن إحنا نجيب ناس نهزقها ؟؟؟

بغض النظر إن معظم الدول العربية بحاجة للفلوس دي .... وبغض النظر إن معظم البلاد دي عندها ميت مليون حاجة أدعى للصرف المبالغ فيه ده،، على الأقل إحترم الناس إللي جاية من أخر الدنيا علشان تحاول..

خلاص.. بفرض إن إحنا عدينة الفلانكات (كعالم عربي) وبقينا مش عارفين نودي الفلوس الفايضة فين،، مش موضوعنا...

لو رجعنا بقى وبصينا على إعلان البرنامج للموسم الجديد... أنا فاكرة الإعلان نفسه كان في جملة في الأخر "ولو مش عارف تمشي ... يا سيدي إزحف"

ما هو ده زحف.... ولا الزحف إني أبقى نجمة من أول ماجيلكوا؟؟؟

ولو أنا أصلاً نجمة.... هاحتاجكوا في إيه؟؟!!!

كان الأدعى بدل ما نجيبها ونهزقها .. إننا في الإختبار المبدئي (إللى مش على التليفزيون) نقولها إنتي ناقصك كذا وكذا ومحتاجة تدربي على كذا وكذا.. وهنستناكي السنة الجاية..

أو أصلاً من التجارب الأولية... معلش إحنا بندور على حاجات معينة...

بدل ما نجيبها ونخليها تريقة لكل من يتحدث باللغة العربية..أو اي لغة تانية والله... إيه رأيكوا؟؟ ها؟؟

وبعدين أصلاً مش كل الناس بتتقبل النقد الساخر، المهين ده بصدر رحب وروح رياضية..

ما ممكن الكلام ده يخلي بنت مش قادرة تخرج من بيتها،، 

أو يخلي ولد يبقى مهزقة دايرته الصغيرة (ده بعد ما بقى تريقة في العالم كله)..

ليه تؤذي حد وتسببله مشاكل نفسية بالشكل ده؟؟

العيب مش على الناس اللي شايفة نفسها كويسة.. العيب على اللي بيشجع الناس ويعشمهم وبعدين يمسح بكرامتهم الأرض...