2017 وكل سنة وانتم طيبين

بقالي فترة عايزة أكتب .... بس مافيش أي فكرة محددة في دماغي حاسة إني ممكن أكتب عنها...

بس لما فكرت شوية كدة...

لاقيت إن دماغي فيها مليون حاجة شغلاها...

مشوشة بشكل بالغ،، يصعب على أي حد إنه يطلع منها حاجة واضحة ومرتبة... حتى لو كان الحد ده هو أنا...

تأملات الدائري اللي كنت بكتبها وبحبها وبتهون علي الطريق.. بقت قليلة..

لأني بقيت بفكر أكتر وطول م انا عليه في حاجة واحدة بس...

هي الدنيا زحمة على طول ليه؟؟!!!!

وبقى الوقت اللي بقضيه على الدائري ما هو إلا عقاب إلهي  لكل الناس اللي قررت انها تنزل وتشتغل..  بما فيهم انا طبعاً..

بصيت كده.. إيه ده؟؟!!  ده إحنا دخلنا سنة جديدة..
مع إن في أحداث من السنة اللي قبلها.. فكراها كأنها إمبارح..

ومش حاسة إن عدى عليها وقت طويل...

ركزت أكتر...

فوجئت بإن يومي هو هو تقريباً كل يوم...

هل ده السبب؟؟

الروتين؟

هل الروتين هو السبب في إن السنين بتعدي من غير ما ناخد بالنا؟؟

ولا كتر الأفكار والحياه المرهقة والمسئوليات والالتزامات التي لا تنتهي..

ولا الأحداث اللي كلها بقت شبه بعضها..

مش عارفة...

كل اللي أنا عارفاه إني هلبس الدائري وزحمته تاني وانا مروحة...