في احدى يومياتي على الدائري... جال بخاطري احدى الافكار الكونية...
فكرت ان كل حاجة بتتغير كل ما بنكبر أكتر.
بدءً من شكلك ومنظرك الخارجي...
رؤيتك الأشياء...
أهدافك،
أمالك وطموحتك،
حتى الحب،،
بيختلف في وجهة نظرنا كتير،، في الحاجات إللى بنحتاجها وبنبقى عاوزينها في شريك الحياه... (ونخلي بالنا هنا من الفرق بين اللي محتاجينه واللي عاوزينه)..
يمكن الحاجة الوحيدة اللي بتفضل زي ما هي حب الأم.. مش بيتغير كتير...
بس السؤال الوجودي إللي كان في دماغي هو ليه الواحد كل ما بيكبر بيبقى صعب عليه انه يترمي في حضن حد ويحس على طول بالإطمئنان؟!!!
هل ده علشان كبرنا وبقينا عارفين إن مفيش حاجة مؤكدة؟؟
ولا علشان بقينا شايلين مسئوليات كتير؟؟
شايلين الهم وعاملين دايماً حساب لبكرة
واحنا صغيرين كنا فاكرين ان كل حاجة تمام وكويسة...
وبعقلية الأطفال كان فعلاً مفيش حاجة ينفع تبقى مستحيل...
وبعدين اصلاً معظم اللي إحنا كنا عايزينه أو زعلانين عليه وقارفنا كانت حاجات تافهة وعبيطة...
كل اللي بنتمناه في يوم أكيد هنعرف نوصله...
يمكن لما كبرنا واتحطينا في مواقف،، اتغيرنا وعرفنا إن في واقع وإن ليس كل ما يتمناه المرء يدركه؟؟
ماتوصاتش لإجابة واضحة الحقيقة..
بس اللي أنا وصلتله إن الطفولة،، حلم...
بتصحى منه على كابوس الواقع المقيت.
No comments:
Post a Comment