معرفش دي مرحلة كل الناس بتعدي عليها ولا لأ
بس انا بالتأكيد جت علي فترة ال ولا حاجة
خليني فالأول اشرح ايه اللي انا اقصده بمرحلة ال ولا حاجة...
باختصار شديد بتدخل في حته مش مظلمة، بس مش مضيئة...
مش مبسوط، بس فل يعني، مش متضايق
احلامك وطموحاتك بتبقى مش موجودة
مالكش نفس تعمل حاجة
كله عادي
البني ادميين اللي حاوليك برضه مهما كنت بتحبهم بيبقى عادي لو شوفتهم او لأ...
بيبقى كله... تمام... صباح الفل يعني...
المرحلة الجميلة دي... بتبقى حتى مش واخد بالك من الوقت فيها...
تقدر تقول انك وقعت في ثقب اسود -واسمحولي اقولكم ثقب اسود كده في نص الكلام- ولا عارف تخرج منه ولا عارف ايه اللي جابك هنا اصلاً
(وقعت يا قلبي ومحدش سمى عليك)
المرحلة دي من اقذر الحاجات اللي ممكن تحصل لأي حد... صراحة انا مش عارفة ده بيبقى تشخيصه اكتئاب ولا ايه ... بس انا شايفاها ان الجسم بيبقى زي الكمبيوتر كده.... لو الضغط زاد قوي عليه... بيفصل...
انا شايفاها كده، ان جسمك ومخك بيجبروك انك تفصل ، علشان تعرف تكمل....
حلو قوي الكلام ده.. انا بكتب الكلام ده ليه بقى؟!
ده سؤال حلو معنديش إجابة عليه الحقيقة...
عمتم مساءاً
