افكار غير متصلة

كان نفسي اوي وطول عمري نفسي يبقى عندى سوبرمان بتاعي

يبقى معايا على طول ويحميني ويدلعني... 

قعدت فترة في حياتي فاكرة ان ده اهم حاجة....

ومش مهم اي حاجة تانية... 

بس بعد وقت... بقيت شايفة ان الراجل يكون حنين وعنده قدرة على استيعابي اهم بكتير من انه يكون سوبرمان...  لأني تقريباً اقدر اعمل كل حاجة ثانية لنفسي... او هحاول يعني... 

بس الواحد في هذا العالم المرير... بيبقى محتاج سعات كتير لحد يطبطب على قلبه... يطيب خاطره... ويفهمه ويحتويه... 

في ناس قلوبها حجر... 

ما بتتهزش... 

بيحسسوك من غير ما يعملوا حاجة انك بتشحت منهم الحب او العاطفة بشكل او بآخر... 

علشان انت باقي على العشرة... او علشان لسة بتحبهم... لسة عندهم في قلبك رصيد كافي انك تحاول توصلهم... 

معرفش ليه انا بقيت شايفاهم وبتعرضلهم اكتر من اي حاجة ثانية ومن اي وقت تاني... 

كنت بشوف في الافلام بيجيبوا سعات واحد او واحدة بتعيط والدموع بتنزل من غير اي تغيير في الملامح... 

وعمري ماعرفت بيعملوا كده ازاي... 

بس بعد تفكير كتير لقيت ان... القهرة والحزن ممكن يخلوا حد يعيط من غير صوت... من غير تغيير في ملامح الوجه... من غير حتى ما ياخد باله انه بيعيط... 

الإحساس بالظلم.. ممكن يعمل كده... 

الإنكسار ووجع القلب ... احساسين ماتمناش ان اي حد يمر بهم... 

انا كنت فاكرة ان الموت كان اكتر حاجة مؤلمة ممكن تحصل... بس طلع لأ... في حاجات بتوجع اكثر من كده... وبتكسر اكتر من كده...

انا كتبت حاجات مالهاش علاقة ببعضها... دي خزعبلات وافكار تايهة وعايمة في دماغي... 

فسيأتي اليوم الذي اصبح فيه لا شئ سوى تلك السطور المكتوبة باللغة العامية ... ولكنها نابعة من اعماق اعماق قلبي...