تتلخص معظم ساعات حياتي في كلمة واحدة...
"الدائري"
أه والله، بقضي عليه أغلب وقتي اللي مش في الشغل.. وده تقريباً حال كل
الناس...
وبما إني بقضي نص حياتي عليه.. ده بيديني متسع من الوقت الحقيقة علشان
أفكر وادخل في أسرار الكون وخفاياه.. طبيعي ما أنا قعدة في العربية محشورة في
الزحمة ومفيش حاجة تتعمل أوي...
في العادي ببقى قاعدة بسمع الراديو أو مشغلة AUX
وقاعدة بيسمع مختاراتي الشخصية وبتفرج على الطيارات
الورق اللى العيال بيطيروها..
أو مثلاً لو شكل السحب حلو حوالين الشمس وهي بتغرب..
يعني الوقت والساعات بيعدوا...
لكن كل كوم بقى والوقت اللي قبل رمضان ده كوم ثاني خالص..
تحس فجأة إن الدائري بقى عبارة عن أوضة بنت أو ولد في سن المراهقة ومغرقينها
بوسترات وصور التمثيليات..
معنديش مشاكل برضه تمام... أماكن فاضية للإعلان.. ومحدش هيقول للرزق لأ...
أنا بس عندي تعليق بعد ما شوفت اعلانات مسلسلات رمضان...
مش على كمية المسلسلات الرهيبة... لان السوق مفتوح وكل واحد عقله في
راسه و دماغه مريحاه....
التعليق بتاعي على كمية البوتوكس والسليكون و شد الوش اللي اغلب
الممثلات عاملينه دلوقتي...
ليه والله؟؟
يعني هو كده انتوا احلى؟؟
يعني هو كده انتوا احلى؟؟
لازم حد يا جماعة يوعيهم ويقولهم ان كل سن وله جماله و مش عيب انكوا
يبقى عندكوا علمات تقدم السن وتجاعيد... وإن البوتكس الأوفر ده (واسمحولي أقول
أوفر) بيخلي شكلكوا ما هو إلا كورتين طلعلهم وش!! فيبقى ليه نعمل كده في نفسنا؟؟
في ناس شايفة إن كل واحد حر يعمل اللي يريحوا... وأنا برضه شايفة
كده..
و شايفة برضه إن لو جبت لكل واحد عقلين على عقله مش هيعجبه غير عقله...
بس برضه النصيحة واجبة مهما كان...
يمكن تحسن مسار البوتوكس عندنا ،،،
بدل
ما كلهم طلعين زي الساحرات الشريرات !
No comments:
Post a Comment